INCLUSCHOOL: Ny kunnskap om inkludering

Studiar viser at det er få moglegheiter for at stemmene til elevane blir høyrde når det gjeld inkludering. Målet med forskingsprosjektet INCLUSCHOOL er å identifisere både barrierar og moglegheiter for dette, og å utvikle ny kunnskap om inkludering og inkluderande praksisar i skulen.

Matematikksenteret si rolle i prosjektet er å undersøkje korleis elevar inkluderer kvarandre når dei samhandler i matematikk, og korleis lærarar kan leggje til rette for at elevane blir ein ressurs for kvarandre (Arbeidspakke 2 i INCLUSCHOOL). 

Forskarane skal analysere samtalar mellom tre ulike lærarar og elevane deira for å identifisere ulike interaksjonsmønster og moglegheiter elevane har for å nå fram med erfaringane og stemmene sine. Prosjektet har eit spesielt søkjelys på fleirspråklege elevar.

– Vi skal sjå nærare på korleis dei fleirspråklege elevane blir inkluderte i klasseromssamtalar om matematikk. Utgangspunktet vårt er at samtalar mellom elevar og lærarar gjerne er «asymmetriske», noko som mellom anna kjem av forskjellar i alder, utdanning og rolle, seier Camilla Normann Justnes, førstelektor ved Matematikksenteret NTNU.

I prosjektet samarbeider ho tett med Irmelin Kjelaas frå institutt for lærereutdanning ved NTNU og Patrick Stefan Kermit frå institutt for psykisk helse ved NTNU.